Sahibkar xidmət müqaviləsi

Bu Müqavilə, bir tərəfdən reserv.az platformasının sahibi (bundan sonra `platforma`) ilə digər tərəfdən platforma vasitəsilə xidmət göstərən Sahibkar arasında bağlanır. Qeydiyyatdan keçməklə Sahibkar bu Müqavilənin bütün şərtlərini qəbul etmiş sayılır.

1. TƏRƏFLƏRİN TƏRİFİ

• Platforma — reserv.az domenli onlayn rezervasiya xidməti;
• Sahibkar — platforma vasitəsilə öz obyektini (villa, ev, salon, klinika və s.) müştərilərə təqdim edən fiziki və ya hüquqi şəxs;
• Müştəri — platforma vasitəsilə rezervasiya edən istifadəçi;
• Avans (Beh) — müştərinin rezervasiya zamanı ödədiyi ilkin məbləğ;
• Komissiya — platformanın hər uğurlu ödənişdən aldığı xidmət haqqı.

2. MÜQAVİLƏNİN MÖVZUSU

Platforma, Sahibkara öz rezervasiya xidmətlərindən istifadə etmək imkanı verir. Bu xidmətlərə aşağıdakılar daxildir:

• Sahibkara fərdi rezervasiya səhifəsinin (URL) yaradılması;
• Onlayn avans ödənişinin qəbul edilməsi;
• Müştəriyə və Sahibkara rezervasiya bildirişlərinin göndərilməsi;
• Sahibkar panelinin (rezervasiyalar, maliyyə və s. hesabatlar) təmin edilməsi

Qeyd: Platforma yalnız texniki vasitəçilik xidməti göstərir. Sahibkarın müştəriyə qarşı öhdəlikləri platformanın məsuliyyəti deyildir.

3. KOMİSSİYA VƏ ÖDƏNİŞ ŞƏRTLƏRİ

3.1 Komissiya faizi

Hər uğurlu rezervasiya zamanı avans ödənişindən Platforma tərəfindən komissiya tutulur. Komissiya faizi hər Sahibkar üçün Platforma tərəfindən ayrıca müəyyən edilir və Sahibkar panelində göstərilir.

3.2 Payout (Köçürmə) məntiqi

• Müştəri avansı Epoint vasitəsilə Platformaya daxil olur;
• Platforma komissiyasını çıxdıqdan sonra qalan məbləği Sahibkara ödəyir;
• Köçürmə zamanı Sahibkar hesab məlumatlarını paneldə aktual saxlamalıdır;
• Köçürmənin çeki Sahibkar panelindən izlənilə bilər.

3.3 Gəlişdə ödəniş

Ümumi məbləğin avans çıxılmaqla qalan hissəsi müştərinin gəliş günü birbaşa Sahibkara ödənilir. Bu məbləğ platformadan keçmir.

4. SAHİBKARIN ÖHDƏLİKLƏRİ

• Platformaya daxil etdiyi məlumatların (qiymət, şəkil, şərtlər və s.) düzgün və aktual olmasını təmin etmək;
• Təsdiqlənmiş rezervasiyalarda müştərini müqavilə şərtlərinə uyğun qəbul etmək;
• Müştərilərə etik və keyfiyyətli xidmət göstərmək;
• Əlaqə nömrəsini və e-poçtunu aktual saxlamaq ki, bildirişlər çatsın;
• Bank hesabı məlumatlarını düzgün təqdim etmək.

5. PLATFORMANIN ÖHDƏLİKLƏRİ

• Sahibkara fərdi rezervasiya səhifəsi yaratmaq;
• Hər rezervasiyada Sahibkara ani bildiriş göndərmək;
• Avans ödənişlərini etibarlı şəkildə emal etmək;
• Komissiya çıxılandan sonra qalan məbləği müəyyən vaxt ərzində Sahibkara köçürmək;
• Sahibkar panelini istifadəyə vermək və texniki dəstək göstərmək.

6. LƏĞVETMƏ VƏ BEH QAYDASI

6.1 Müştəri tərəfindən ləğvetmə

Müştəri rezervasiyanı ləğv etdikdə avans məbləği geri qaytarılmır. Platforma komissiyasını saxlayır, qalan məbləğ Sahibkara ödənilir.

6.2 Sahibkar tərəfindən ləğvetmə

Sahibkar rezervasiyanı ləğv etdikdə müştərinin avansı tam geri qaytarılır. Dəfələrlə əsassız ləğvetmə halında hesab bloklanma hüququ qorunur.

7. MÜQAVİLƏNİN MÜDDƏTİ VƏ XİTAMI

Müqavilə Sahibkarın qeydiyyatını tamamladığı tarixdən qüvvəyə minir və müddətsizdir. Hər iki tərəf 15 gün əvvəl yazılı (e-poçt) bildiriş göndərməklə müqaviləni ləğv edə bilər.

Aşağıdakı hallar müqavilənin xitamına səbəb ola bilər:

• Sahibkarın platformanın şərtlərini kobud şəkildə pozması;
• Müştərilərin şikayətlərinin təkrarlanması;
• Saxta məlumatların daxil edilməsi.

8. MƏXFİLİK

Tərəflər bir-birinin kommersiya məlumatlarını (komissiya faizi, dövriyyə, müştəri bazası və s.) üçüncü şəxslərə açıqlamamağı öhdəsinə götürür.

9. MÜBAHİSƏLƏRİN HƏLLİ

Müqavilədən irəli gələn mübahisələr ilk növbədə danışıqlar yolu ilə həll olunur. Razılıq olmadıqda Azərbaycan Respublikasının qanunvericiliyinə uyğun olaraq məhkəmə yolu ilə həll edilir.

10. DİGƏR ŞƏRTLƏR

• Bu Müqavilə Azərbaycan Respublikasının qanunlarına tabedir;
• Platforma müqavilə şərtlərini 30 gün əvvəl bildiriş etməklə dəyişdirə bilər;
• Sahibkar qeydiyyatdan keçməklə şərtləri qəbul etmiş sayılır.